သို့အားဖြင့် အဲဒီတမန်တော်ကြီးများဟာ မိမိတို့အပေါ် တာဝန်တင်လာတဲ့ အလုပ်ကိစ္စကို ဆောင်ရွက်တော်မူကြပါတယ်။
အီဗရာဟမစ်ရီလေးဂျင်းခေါ် ဂျူး၊ ခရစ်ယာန်နဲ့ အစ္စလာမ်သာသနာဝင်တွေ လေးစားကြတဲ့ တမန်တော်ကြီးတစ်ပါး ရှိပါတယ်။ သူ့ကို မောရှေ၊ မိုးစက်၊ မူဆာဆိုပြီး မိမိတို့ ဘာသာစကားအလိုက် ခေါ်ဝေါ်ကြပါတယ်။
ဘုရင်ဆိုး ဖာရော (ဖီရ်အောင်န်) လက်ထက်။ ဂျူးလူမျိုး တွေကို ကျွန်ပြုပြီး အဓမ္မစေခိုင်းနေတဲ့အချိန်ကဖြစ်ပါတယ်။
ဖာရောရဲ့ ပုရောဟိတ်တွေက ဂျူးလူမျိုးထဲက တစ်ဦးကတော့ဖြင့် ဘုရင်မင်းကြီးကို သတ်လိမ့်မယ်ဆိုပြီး ဟောကိန်းထုတ်ထားတဲ့ကာလ။
မွေးဖွားလာမယ့် ကလေးတွေကို သတ်ပြစ်ရမယ်ဆိုတဲ့ ဖာရောအမိန့်ကြောင့် မိဘများရဲ့စွန့်ပစ်ခံ မိုးစက်ကို ဖာရောရဲ့ ဇနီးက တိတ်တိတ်ပုန်းမွေးစားခဲ့ပါတယ်။
အမိအဖမဲ့ မွေးစားသားကလေးမိုးစက်။ မျက်နှာငယ်ဘဝနဲ့ ကြီးပြင်းခဲ့ရပါတယ်။ ဂုဏ်မောက်တဲ့ ဘုရင်ဖာရောကြောင့် မိမိရဲ့ ငယ်ဘဝဟာ အကျည်းတန်ပြီး၊ မိရင်းဖရင်းတွေလို နည်းလမ်းတကျ ပြုစုပျိုးထောင်ပေးတာမျိုးမရခဲ့ပါ။
သိမ်ငယ်တတ်တဲ့ အငုံ့စိတ်၊ မိမိကိုယ်ကို အပြစ်တင်တတ်တဲ့ low self-esteem စိတ်ဓါတ်အခံတွေနဲ့ ကြီးပြင်းလာခဲ့တဲ့ မိုးစက်။
ဘုရားရှင် အလ္လာဟ်က သူ့ကို တမန်တော်အဖြစ်ရွေးချယ်တော်မူခဲ့ပါတယ်။ ရည်ရွယ်ချက်ကတော့ ဖာရောကို တရားလမ်းမှန်ပြစေဖို့။
သက်ဦးဆံပိုင် မင်းဆိုးမင်းညစ်ဖာရော။
မိုးစက်ခမြာ ငယ်ရွယ်စဉ်ကလေးဘဝတုန်းက ဖာရောရဲ့မုတ်ဆိတ်မွေးတမျှင်ကို ဆွဲနုတ်ပစ်လေတော့၊ ဖာရောက ထွန့်ထွန့်လူးပြီး မွေးစားကလေး၊ ငါ့မုတ်ဆိတ်ကို ဆွဲနုတ်တာ နိမိတ်မကောင်းဘူး၊ သတ်ပစ်လေရော့ဆိုပြီး အမိန့်ပေးခဲ့ဖူးပါတယ်။ မွေးစားမိခင်က မိမိသားကလေးအဖြစ်ဆိုးမကြုံရလေအောင် ကြားဝင်ပြီး ကလေးမို့ မသိတတ်လို့ပါ လို့ လျှောက်ပေးတော့ ဒါဆိုရင် မီးကျက်နေအောင် ကင်ထားတဲ့ သံဘောလုံးနဲ့ ဆင်တူပုံစံရှိတဲ့ စားစရာတမျိုးကို ထည့်ပြီး မိုးစက်ကို အပေးခိုင်းပါတယ်။ မိုးစက်ကလည်း မီးပူနေတဲ့ ဘောလုံးကို ပါးစပ်ထဲ ထည့်လေတေ့ာ လျှာမှာ ကျက်ပြီး အပူလောင်ပါတော့တယ်။ အဲဒီအပူဒဏ်ကြောင့် မိုးစက်ခမြာ တစ်ဘဝလုံး စကားပြောရင် ထစ်ငေါ့နေပါတော့တယ်။ (ကုရ်အာန်ကျမ်းတော်လာ တင်ပြချက်မဟုတ်ပါ။ အတ္ထကထာပညာရှင်များ၏ သမိုင်းမှတ်တမ်းသာ ဖြစ်ပါသည်။)
ဒါပေမယ့် ဘုရားရှင်က မိမိအပေါ် တာဝန်ကြီးတစ်ရပ်ကို ဆောင်ရွက်ဖို့ အမိန့်ပေးစေခိုင်းလိုက်ပြီ။
‘Go thou to Pharaoh; he has indeed exceeded all bounds.’ ဖာရောထံသွားလော့။ မလွဲဧကန်ပင် ထိုဖာရော (ဖီရ်အောင်န်)မှာ လွန်ကျူးရာတွင် အဆီးအတားမဲ့၍ နေချေပြီ။ (Al Taha, Ayat 25)
အစ္စလာမ်သာသနာဝင်တွေအတွက် အလွန်တရာကြီးမားပြီး မွန်မြတ်တင့်တယ်လှတဲ့ အလုပ်တာဝန်၊ ဒါဝတ်အီလလ္လာဟ် ခေါ် အလ္လာဟ်အရှင်မြတ်ဘက်တော်သို့ ဖိတ်ခေါ်ခြင်း။ ဒီလုပ်ငန်းတာဝန်ကို ထမ်းဆောင်ပြီး ဘုရင်ဖာရောကို လမ်းညွှန်ဖို့ရာ မိုးစက်အပေါ် တာဝန်တင်လေပြီ။
သိမ်ငယ်စိတ်၊ စကားထစ်တဲ့ အားနည်းချက် စတာတွေရှိနေတဲ့ မိုးစက်ဟာ မိမိအရှင်ရဲ့ အမိန့်ပေးစေခိုင်းမှုကို ထမ်းရွက်ဖို့ရာ အသင့်ဖြစ်ခဲ့ပါတယ်။
သို့သော် ညီအစ်ကိုဖြစ်တဲ့ အာရန် (ဟာရွန်) ကို ဖာရောဆီသွားပြီး ဟောပြောတင်ပြရာမှာ အကူအညီအဖြစ်လိုက်ပါစေဖို့ အလိုရှိတာနဲ့အညီ၊ မိမိရဲ့ ဘုရားရှင် အလ္လာဟ်ထံမှာ ညီအစ်ကို အာရန်ကိုလည်း တမန်တော်အဖြစ် ချီးမြှင့်ပေးဖို့ရာ ပန်ကြားလျှောက်ထားခဲ့ပါတယ်။
‘And grant me a helper from my family —
‘Aaron, my brother;
‘Increase my strength with him,
‘And make him share my task, (Al Taha, Ayat 30 to 36)
မိုးစက်ဟာ အာရန်အားဖြင့် ကျွန်တော်မျိုး၏ အင်အားကို တိုးမြှင့်ဖြည့်တင်းပေးတော်မူလှည့်ပါ ဆိုပြီး ဆုတောင်းခဲ့ပါတယ်။
အစ်ကိုဖြစ်သူအာရန်ဟာ အာဝဇ္ဇန်းရွှင်ပြီး တင်ပြပြောဆိုရာမှာလည်း လူအများနားလည်လွယ်အောင် ပြောဆိုတတ်တာကြောင့် မိုးစက်တစ်ယောက် အားကိုးခဲ့ပါတယ်။
ဘုရားရှင်အလ္လာဟ်ကလည်း မိုးစက်ရဲ့ ဆုတောင်းမှုကို လက်ခံတော်မူပြီး ညီအစ်ကိုနှစ်ယောက် ဘုရင်ဖာရောထံသွားကြဖို့ ဖြစ်လာပါတော့တယ်။
အနှိမ်ခံ၊ သိမ်ငယ်စွာကြီးပြင်းခဲ့ရတဲ့ မိုးစက်၊ မောက်မာပြီး မိမိကိုယ်ကို ဘုရားတစ်ဆူလို့ ထင်မှတ်နေကာ ယုံကြည်မှုလွန်ကဲနေတဲ့ ဘုရင်ဆိုးဖာရောကို စကားပြောဖို့ အခက်အခဲတွေရှိနေတဲ့မိုးစက်ဟာ ဖာရောရဲ့ ညီလာခံကို ဝင်ရောက်ပြီး ဒါဝါ(အလ္လာဟ်ဘက်သို့ဖိတ်ခေါ်ခြင်း) ပြုလုပ်ဖို့ရန်အတွက် မိမိဘုရားရှင်အလ္လာဟ်ထံတော်မှာ အောက်ပါအတိုင်း ဆုတောင်းခံခဲ့ပါတော့တယ်။
قَالَ رَبِّ اشۡرَحۡ لِیۡ صَدۡرِیۡ ﴿ۙ
Moses said, ‘My Lord, open out for me my breast
‘And ease for me my task,
‘And loose the knot of my tongue,
That they may understand my speech,
(Al Taha, Ayat 26 to 29)
အို.. အရှင်မြတ်။ ကျွန်တော်မျိုး၏ ရင်ဘတ်အားကျယ်ပြောစေတော်မူလှည့်ပါ။ ကျွန်တော်မျိုးထမ်းဆောင်ရမည့် တာဝန်ဝတ္တရားအား ကျွန်တော်မျိုးအတွက် လွယ်ကူစေတော်မူပါ။ ကျွန်တော်မျိုး၏ လျှာမှ အထုံးကို ဖျည်ပေးသနားတော်မူပါ။ သို့အားဖြင့် ယင်းသူတို့သည် ကျွန်တော်မျိုး၏ ပြောစကားကို နားလည်နိုင်ကြပါမည်။
မိုးစက်က ညီအစ်ကို အာရန်နဲ့အတူ ဖာရောရဲ့ ညီလာခံကို ဝင်ရောက်ခဲ့ပါတယ်။
ဘုရင်ဆိုး ဖာရောကို တရားဟောပြောရာမှာ မိမိအားကိုးတဲ့ အစ်ကိုကြီးအာရန်ကို မိုးစက်က ဦးဆောင်ခဲ့ပြီး၊ ဖာရောရဲ့အရှေ့မှာ ဉာဏ်အမြော်အမြင်နဲ့ ပြည့်ဝလှတဲ့ တရားဓမ္မကို ဟောပြောတင်ပြခဲ့ယုံမက၊ ဖာရောနဲ့ အပေါင်းအပါများရဲ့ ဆန့်ကျင်ဘက်မေးခွန်းများကိုပါ ဆီလျော်အပ်စပ်ပြီး ရှင်းလင်းပြတ်သားတဲ့ ဥပမာများနဲ့ အပြန်အလှန် အချေအတင်ဆွေးနွေးခဲ့ပါတော့တယ်။
ရလဒ်ကတော့ ကမ္ဘာ့သမိုင်းစာမျက်နှာထက်မှာ အံ့ဘနန်းအဖြစ် မှတ်တမ်းတင်ထားခံရတဲ့ Exodus။ ဘိုင်ဘယ်လ်ကျမ်းစာအလိုအရ ဂျူးလူမျိုးပေါင်း ၂ သန်းကို ဦးဆောင်ပြီး မိုးစက်ဟာ ခါနန်မြေကို ထွက်ခွာနိုင်ခဲ့ပါတယ်။ (၂ သန်းဆိုတဲ့ ပမာဏကို သမိုင်းဆရာတွေကို ရှုထောင့်မျိုးစုံကနေ တွက်ချက်ပြထားတာမျိုးရှိပြီး ၂ သောင်းကနေ ၂ သန်းထိဖြစ်နိုင်တဲ့အကြောင်း စကားချပ်ပါးအပ်ပါသည်။)
အစ္စလာမ်သာသနာမှာတော့ တမန်တော်အပေါင်းရဲ့ ဦးစီးခေါင်းဆောင် တမန်တော်ကြီး မုဟမ္မဒ် (သခင့်အပေါ်သို့ အလ္လာဟ်အရှင်မြတ်ထံတော်ပါးမှ ငြိမ်းချမ်းသာယာခြင်း သက်ရောက်ပါစေ။) သခင်ကို မူဆာ ( မောရှေ) နှင့်တူသောတမန်တော်ဆိုပြီး ခိုင်းနှိုင်းကာ တမန်တော်ကြီး မူဆာ ( မောရှေ)သခင်ဟာ ဂုဏ်ပြုခြင်းခံခဲ့ရပါတယ်။
အလ္လာဟ်အရှင်မြတ်၏ ရွေးချယ်မှုတွင် တစ်စုံတစ်ရာ မှားယွင်းမှုမရှိပါ။
