ကွန်ပျူတာနက်ဝေါ့ခ်ကွန်ယက်တွေဆီ တရားမဝင်ထိုးဖောက်ဝင်ရောက်သူတွေအန္တရာယ်ကို ကာကွယ်ဖို့ စစ်ဆင်ရေးကတော့ အဆုံးရှိမယ်မဟုတ်ပါ။ ဘဘာ၀ရဲ့ အဖန်းဆင်ခံတွေထဲက စစ်ဆင်ရေးစိတ်ဓာတ်မြင့်လှတဲ့ ပုရွက်ဆိတ်တွေကို ဥပမာထားပြီး ဗိုင်းရက်စ်တိုက်ဖျက်ရေးဆော့ဖ်ဝဲတစ်ခု ဖန်တီးလိုက်ပါပြီ။
နေ့စဉ်သုံး ကွန်ပျူတာလုံခြုံရေးပစ္စည်းကိရိယာများကတော့ တစ်နေရာထဲမှာပဲနေပြီး ဝင်ရောက်လာမယ့် အနှောင့်အယှက်တွေကို ဖမ်းဆီးပေးပါတယ်။ ယခု ပုရွက်ဆိတ်အခြေခံ လုံခြုံရေးစနစ်ကတော့ အဲဒီလိုမဟုတ်ပါဘူး။
ဒစ်ဂျစ်တယ်လ်ပုရွက်ဆိတ်များဟာ တစ်နေရာထဲမှာ အငြိမ်နေနေမှာ မဟုတ်ပဲ ကွန်ပျူတာကွန်ယက်စနစ်ကြီးတစ်ခုလုံးကို ပတ်လည်နှံ့ အောင် လည်ပတ်ပြီး “computer worms” လို့ခေါ်တဲ့ အရေးကြီး သတင်းအချက်အလက်များခိုးယူမယ့် ပရိုဂရမ် သို့မဟုတ် မိမိ ကွန်ပျူတာကို တရားမဝင်သုံးစွဲနိုင်မယ့် နည်းစနစ်တွေကို ရှာဖွေမှာ ဖြစ်ပါတယ်။ ရှာဖွေတွေ့ရှိပြီဆိုတာနဲ့ ဒစ်ဂျစ်တယ်လ်ပုရွက်ဆိတ်က တခြားပုရွက်ဆိတ်တပ်သားတွေအားလုံး ပြဿနာဖြစ်ပွားနေတဲ့ နေရာဆီ ချက်ချင်းရောက်လာစေဖို့ ဆောင်ရွက်တော့မှာဖြစ်ပါတယ်။ အဲဒီလိုပုရွက်ဆိတ်တပ်သားတွေကို အခင်းဖြစ်ပွားတဲ့နေရာဆီ အမြန် ဆွဲဆောင်ပေးယုံတင်မက ကွန်ပျူတာသုံးစွဲသူကိုလည်း ချက်ချင်းစုံစမ်းစစ်ဆေးနိုင်အောင် သတိပေး နှိုးဆော်ပါတော့တယ်။ ဒီဒစ်ဂျစ်တယ်လ်ပုရွက်ဆိတ်သုံး လုံခြုံရေးစနစ်ကိုတော့ “swarm intelligence” ၊ စုံစမ်းထောက်လှမ်းရေး အင်းဆက်တပ်မဟာလို့ အမည်ပေးထားပါတယ်။ ကွန်ပျူတာကွန်ယက်စနစ်လုံခြုံရေးမှာ ဆရာတစ်ဆူလည်းဖြစ်၊ ကွန်ပျူတာသိပ္ပံပရောဖက်ဆာလည်းဖြစ်တဲ့ အာရင်ဖဲလ်ပ်က သဘာ၀မှာ ပုရွက်ဆိတ်တွေဟာ ခြိမ်းခြောက်လာတဲ့ရန်သူကို အလွန်အောင်မြင်စွာတားဆီးနိုင်တယ်ဆိုတာ ကျွန်တော်တို့သိထားပါတယ်၊ သူတို့တွေဟာ ကာကွယ်ရေးအတွက် အလျင်အမြန်စုစည်းနိုင်ကြသလို တရားမဝင်ချဉ်းနင်းလာတဲ့သူကိုတားဆီးပြီးတာနဲ့ ပြုပြင်မွမ်းမံရေးတွေကိုလည်း ချက်ချင်းဆောင်ရွက်ကြပါတယ်။ ကျွန်တော်တို့ကလည်း ကွန်ပျူတာစနစ်လုံခြုံရေးအတွက်အဲဒီအတိုင်းလိုက်ပြီး ဆောင်ရွက်ဖို့ ကြိုးစားနေတာပါလို့ ပြောပါတယ်။
Pacific Northwest National Laboratory (PNNL) ရဲ့ ပညာရှင်တစ်ဦးဖြစ်တဲ့ ဂလန်းဖင့်ခ်က ပုရွက်ဆိတ်တပ်မဟာစနစ်ကို parallel processing ခေါ် ကွန်ပျူတာအချက်အလက်များကို အုပ်စုလိုက်ခွဲခြားပြီး အန္တရာယ်ဝင်ရောက်နေမှုရှိမရှိ စစ်ဆေးမှုပေါ်အခြေခံကာ ဆိုင်ဘာလုံခြုံရေးစနစ်သစ်ကို တီထွင်ကြံဆနေပါတယ်။
"ကျွန်တော်တို့ရဲ့ အကြံကတော့ ဒစ်ဂျစ်တယ်လ်ပုရွက်ဆိတ် ၃၀၀၀ လောက်ကို ကွန်ယက်ထဲဖြန့်ကျက်ပြီး အန္တရာယ်ရှိမရှိစုံစမ်းခိုင်းမှာဖြစ်ပါတယ်၊ သူတို့တွေ ကွန်ယက်ထဲလှည့်ပတ်နေရင်းနဲ့ မသင်္ကာဖွယ်တစ်ခုခုတွေ့ရှိပြီဆိုတာနဲ့ ဒီဒစ်ဂျစ်တယ်လ်ပုရွက်ဆိတ်တွေဟာ တကယ့်ပုရွက်ဆိတ်တွေလုပ်လေ့ရှိတဲ့အတိုင်း တခြားနေရာက ပုရွက်ဆိတ်တွေ အန္တရာယ်ဇုန်ကို ရောက်လာနိုင်ဖို့အတွက် အနံ့အသက်တစ်ခုခုဖြစ်အောင် ဖန်တီးဆောင်ရွက်သလိုမျိုး ဆောင်ရွက်မှာပါ။ ဒစ်ဂျစ်တယ်လ်ပုရွက်ဆိတ်တစ်ကောင်ဟာ အန္တရာယ်တစ်ခုကို တွေ့ပြီဆိုရင် အနံ့ခပ်ပြင်းပြင်းတစ်ခုချန်ခဲ့ဖို့ ဖန်တီးထားပါတယ်။ ပိုပီးအနံ့ပြင်းလေလေ ပုရွက်ဆိတ်ခပ်များများကို ဆွဲဆောင်နိုင်လေလေဖြစ်ပြီး အဆုံးမှတော့ swarm ခေါ်ပုရွက်ဆိတ်အုံ့ကြီးဖြစ်ကာ ကွန်ပျူတာခံစားနေရတဲ့ ရောဂါကိုကုစားပေးပါတယ်" လို့ အာရင်ဖဲလ်ပ်က ဆိုပါတယ်။ဒီနှစ်နွေမှာတော့ အာရင်ဖဲလ်ပ်က ကွန်ပျူတာကွန်ယက်ထဲ ဗိုင်းရပ်စ်ထည့်ပြီး ပုရွက်ဆိတ်တပ်မဟာစနစ်နဲ့ စုံစမ်းထောက်လှမ်းရာမှာ အောင်မြင်မှုရခဲ့တာကြောင့် PNNL အနေနဲ့ သုတေသနလုပ်ငန်းကို ဆက်လက်လုပ်ဆောင်သွာဖို့ ဆုံးဖြတ်ခဲ့ပါတယ်။
ကွန်ပျူတာသုံးစွဲသူများအတွက်ကတော့ “swarm intelligence” ၊ စုံစမ်းထောက်လှမ်းရေး အင်းဆက်တပ်မဟာက မိမိတို့စက်ထဲမှာနေရာအတည်တကျယူပြီး နေထိုင်ဆောင်ရွက်ကြမှာလားဆိုတဲ့ စိုးရိမ်မှုမျိုး ရှိစရာမလိုပါဘူး။ ဘာကြောင့်လဲဆိုတော့ “swarm intelligence” က sentinels လို့ခေါ်တဲ့ ဆော့ဖ်ဝဲတစ်မျိုးမှာ တွဲပါလာမှာဖြစ်ပြီး အဲဒီဆော့ဖ်ဝဲကိုပဲ ကွန်ယက်ပေါ်မှာရှိနေတဲ့ ကွန်ပျူတာတစ်လုံးချင်းစီအလိုက် ထည့်သွင်းထားရုံပါပဲ။ အဲဒီဆော့ဖ်ဝဲကနေတဆင့် တပ်မမှူး၊ ဆာဂျင်ဖြစ်တဲ့ ကွန်ပျူတာသုံးစွဲသူထံ ဗိုင်းယက်စ်များသတင်းကို ပေးပို့ပေးမှာဖြစ်ပါတယ်။
Science Daily မှ Ants Vs. Worms: New Computer Security Mimics Nature ကို မြန်မာမှုပြုပါသည်။
